ភ្នំពេញ៖ អគ្គនាយករងនៃអគ្គនាយកដ្ឋានពន្ធនាគារលោក នុត សាវនា បានលើកឡើងថា ក្រោយការដោះលែងមានអ្នកទោសជាងចន្លោះពី ១២% ទៅ ១៤% ដែលមិនបានទទួលការបណ្ដុះបណ្ដាលមុខវិជ្ជាជីវៈបានប្រព្រឹតិ្តបទល្មើសជាថ្មី ដែលចំនួននេះគឺខុសគ្នាច្រើនបើធៀបនឹងអ្នកជាប់ឃុំដែលទទួលបានការបណ្ដុះបណ្ដាលមុខវិជ្ជាជីវៈ។

ថ្លែងក្នុងសន្នីសិទសារព័ត៌មាន ព្រឹកថ្ងៃសុក្រ ទី១៤ ខែតុលា នៅទីស្ដីការគណៈរដ្ឋមន្ត្រី លោក នុត សាវនា បានជំរុញដល់ក្រសួងស្ថាប័នពាក់ព័ន្ធជួយជំរុញដល់ការងារបណ្ដុះបណ្ដាលមុខជំនាញវិជ្ជាជីវៈដល់អ្នកជាប់ឃុំទាំងអស់គ្នាដើម្បីកាត់បន្ថយការប្រព្រឹត្តិបទល្មើសនៅក្នុងសង្គម។

លោកបញ្ជាក់ថា តាមការស្រាវជ្រាវរបស់អគ្គនាយកដ្ឋានពន្ធនាគារឃើញថាក្នុងចំណោមអ្នកទោសចំនួន ១២ ០០នាក់ ដែលជាប់ឃុំ និងទទួលបានការបណ្ដុះបណ្ដាលវិជ្ជាជីវៈនឹងត្រូវដោះលែង មានតែ៩៨នាក់ប៉ុណ្ណោះដែលត្រូវប្រព្រឹត្តិបទល្មើសនឹងត្រូវបញ្ជូនទៅពន្ធនាគារវិញ ខណៈអ្នកទោសដែលមិនបានទទួលការបណ្ដុះបណ្ដាលត្រូវដោះលែងចំនួន ៣៨ ០៥៩នាក់ មាន ៤ ៤៤៥បានប្រព្រឹតិ្តបទល្មើសជាថ្មី ដែលស្មើនឹងប្រមាណ ១២-១៤% ឯណោះ។

លោកថា៖ «ដើម្បីលុបបំបាត់បាតុភាពហ្នឹងទាល់តែស្ថាប័នពាក់ព័ន្ធដូចជាក្រសួងអប់រំក្រសួងការងារ ក្រសួងសង្គមកិច្ច ក្រសួងសុខាភិបាល ហើយនិងអង្គការដៃគូរគាត់ចូលរួមទាំងអស់គ្នាហើយក្នុងហ្នឹងទៀតក៏មានគ្រឹះស្ថានសាសនាដែលមានដូចជាព្រះសង្ឃ ខាងកាតូលិកក្ដី ខាងឥស្លាមក្ដី គាត់ចូលរួមទាំងអស់គ្នាដើម្បីបណ្ដុះបណ្ដាលលើកទឹកចិត្តឱ្យមនុស្សកែខ្លួន»។

គិតមកដល់ឆ្នាំ២០២២ មានកម្ពុជាមានជាប់ឃុំចំនួន ៣៨ ០៤៥នាក់ និងបានបណ្ដុះបណ្ដាលមុខជំនាញវិជ្ជាជីវៈបានចំនួន ១១ ១៦៦នាក់៕